මේ කියන්න යන්නේ නම් ඇත්තටම විශේෂ කතාවක්.
අක්මාව කියන්නේ අපේ ශරීරයේ තවත් එක් වැදගත් ඉන්ද්‍රියක්. ඉතින් ඒ අක්මාව රැකගන්න තවත් එක් ඖෂධීය ටොෆියක් දැන් ලංකාවේදීම නිපදවෙන බව ඔබ දන්නවාද..?
අක්මාව මිනිස් සිරුරේ විශාලතම ඉන්ද්‍රිය මෙන්ම විශාලතම ග්‍රන්ථිය ද වේ. ශරීරයේ ඇති රසායනාගාරය ලෙස ද මෙය හැඳින්විය හැකිය. මිනිස් ශරීරයේ ඉතා විශාල කාර්යභාරයක් අක්මාව මඟින් සිදු කරනු ලබයි. මෙසේ ශරීරයට අවශ්‍ය වැදගත් සේවාවන් රැසක් සිදුකරන අක්මාව ආශ්‍රිතව ඇතිවන රෝග තත්වයන් වර්තමානය වන විට බහුලයි. මේ අනුව ශ්‍රී ලංකාවේ ජනතාවගෙන් 35% ක ප්‍රතිශතයකට අක්මාවේ රෝගී තත්ත්වයන් ඇත.
අක්මාවේ ඇතිවන ලෙඩ රෝග සඳහා ඖෂධීය ටොෆියක් නිෂ්පාදනය කිරීමට ශ්‍රී ලංකාවේ ආයුර්වේද සමාගමක් සමත් වී ඇත. අලව්ව ප්‍රදේශයේ පිහිටා ඇති මෙම පෞද්ගලික සමාගමේ නිෂ්පාදනයක් වන මෙම ටොෆිය, අක්මාවේ ක්‍රියාකාරීත්වය යෝග්‍ය මට්ටමින් පවත්වාගෙන යාමට උපකාරී වන බව එම ආයතනයේ අධ්‍යක්ෂ චමින්ද රූපසේන පවසනවා. ඔහු වැඩිදුරටත් ඒ ගැන කිව්වේ මෙන්න මේ වගේ කතාවක්.
“ලෝකයටම ඖෂධීය ටොෆියක් හඳුන්වාදීමේ සංකල්පයේ පුරෝගාමියා වන්නේ අපේ ආයතනයයි. සාමාන්‍යයෙන් ලෙඩ රෝගයකට ආයුර්වේදයේ ප්‍රතිකාර ලෙස නිර්දේශ කරන්නේ ගුළි හෝ තෙල් ආදී සාම්ප්‍රදායික ක්‍රමවේදයන් වේ. නමුත් අපි ඊට එහා ගිහින්, ඖෂධීය ගුණය එලෙසම පවත්වා ගනිමින්, නවීන තාක්ෂණය උපයෝගී කරගෙන, මිනිසුන්ටත් පරිභෝජනයේ දී ආස හිතෙන රසයකින් යුතුව අපි මේ ආයුර්වේදී ටොෆිය නිෂ්පාදනය කරලා තිබෙනවා.”
“කුඩා කාලයේ සිට ගන්න ප්‍රතිජීවක ඖෂධ හා ආහාර රටාවත් සමඟ අපේ අක්මාවට ලොකු බලපෑමක් එල්ල වෙනවා. මේ හේතූන් නිසා අඩපණ වෙලා තිබෙන අක්මාව ප්‍රාණවත් කරන්න මේ නිෂ්පාදනයට හැකියාව තිබෙනවා. අක්මාව සම්බන්ධයෙන් කතා කරද්දි එහි ක්‍රියාකාරීත්වයට සුදුසු ඖෂධයක් ලෙස ආයුර්වේදයේ සලකන්නේ හීන්බෝවිටියා. හීන්බෝවිටියා කියන්නේ ඒකදේශික ශාකයක්.”
හීන්බෝවිටියා ශාකය එහි ඇති විශිෂ්ට හෙපටෝප්‍රොටෙක්ටිව් (අක්මාව ආරක්ෂා කිරීමේ) ගුණාංග නිසා දේශීය වෛද්‍ය විද්‍යාවේදී ඉතා ඉහළින් අගය කරනු ලබයි. එය “අක්මාවේ මිතුරා” ලෙස ද හැඳින්වේ.
“ඒ වගේම අක්මාවට හිතකර බලපෑමක් ඇති කරන ආයුර්වේදයේ ඖෂධයක් තමයි සියඹලා. ඒ වගේම සියඹලා ප්‍රතිශක්තිය වඩවන්න පුළුවන් ආයුර්වේදයේ විශේෂ ඖෂධයක්. මේ වගේ ඖෂධීය ගුණයෙන් යුතු ද්‍රව්‍ය උපයෝගී කරගෙන තමයි මේ නිෂ්පාදනය හදලා තිබෙන්නෙ.”
“මෙම ටොෆිය නිසි ආයුර්වේද වෛද්‍යවරුන්ගේ අධීක්ෂණය යටතේ නිෂ්පාදනය කරලා, ආයුර්වේද දෙපාර්තමේන්තුවේ සූත්‍ර පනත යටතේ අනුමැතිය ලබාගෙන තිබෙන නිෂ්පාදනයක්. මේ නිෂ්පාදනයට ලංකා කාර්මික මණ්ඩලයේ තත්ත්ව සහතිකය (ITI තත්ව සහතිකය), ISO තත්ව සහතිකය හා GMT සහතිකය අප කර්මාන්තශාලාව වෙනුවෙන් ලබා ගෙන තිබෙනවා.”
ආයුර්වේද ඖෂධ සකස් කරනු ලබන්නේ බොහෝදුරට ස්වාභාවික ශාක, සත්ත්ව සහ ඛණිජ ද්‍රව්‍ය මත පදනම් වීමෙනි. එම නිසා ඒවා කල්තබා ගැනීමට කෘත්‍රිම හෝ ප්‍රමිතියෙන් තොර ද්‍රව්‍ය එකතු කිරීම යනු එම ඖෂධවල මුල් ස්වභාවය සහ ගුණාත්මකභාවය විනාශ කිරීමකි. එමෙන්ම සාම්ප්‍රදායික වෛද්‍ය ක්‍රමවල විශ්වාසනීයත්වය සහ ඵලදායිතාව කෙරෙහි සෘජුවම බලපාන බැරෑරුම් තත්ත්වයකි. මේ අනුව චමින්ද රූපසේන මහතා ඖෂධීය ටොෆියේ අඩංගු කර ඇත්තේ ස්වාභාවිකම අමුද්‍රව්‍ය බව පෙන්වා දෙයි.
“හීන්බෝවිටියා, සියඹලා වගේ ටොෆියේ අමුද්‍රව්‍යවලට කෘත්‍රිම කල්තබා ගැනීමේ ද්‍රව්‍ය එකතු කරලා නැහැ. අපි හැමවෙලාවෙම උත්සාහ කරන්නේ ස්වාභාවික නිෂ්පාදනයන් උපයෝගී කරගෙන ආයුර්වේද ඖෂධයන් නිෂ්පාදනය කිරීමටයි. ඒ අනුව මෙම ටොෆිය සඳහා මී පැණිවලින් තමයි කල්තබා ගැනීමේ තත්ත්වය ඇති කරලා තිබෙන්නෙ. නිවැරදි ක්‍රමවේදය අනුව නෙළා ගන්නා දේශීය මී පැණි තමයි මේ සඳහා යොදාගෙන තිබෙන්නෙ.”
ආයුර්වේදය රෝග ලක්ෂණ පමණක් සමනය කිරීමට වඩා, රෝගයේ මූලික හේතුව හඳුනාගෙන එය සුව කිරීමට උත්සාහ කරයි. මෙය පුද්ගලයාගේ සමස්ත සෞඛ්‍ය තත්ත්වය සහ තුන්දොස් (වාත, පිත්ත, සෙම්) සමබරතාව යථා තත්ත්වයට පත් කිරීම අරමුණු කරයි. ඒ අනුව මෙම ඖෂධ නිකම්ම රෝග සුව කිරීමට නොව, ප්‍රතිශක්තිකරණ පද්ධතිය ශක්තිමත් කිරීමට, ජීව ශක්තිය වැඩි කිරීමට සහ ශරීරය නිරෝගීව පවත්වා ගැනීමට ද උපකාරී වේ. එමෙන්ම මෙය රෝග නිවාරණයට ද වැදගත් වේ.
“මෙම ටොෆියට අමතරව ගොරකා උපයෝගී කරගෙන කළ තවත් නිෂ්පාදනයක් තිබෙනවා. එය සිරුරේ මේදය අඩු කර ගැනීම වෙනුවෙන් කළ නිෂ්පාදනයක්. මේ නිසා තරබාරු බව අඩු කර ගන්න පුළුවන්, ඒ ගැන සායනික පරීක්ෂණ කරලා ඔප්පු වෙලා තිබෙනවා. විශ්වවිද්‍යාල මහාචාර්යවරුන් සහ විද්‍යාර්ථීන් සම්බන්ධ කරගෙන මිනිසුන් 108 දෙනෙකුට මේ නිෂ්පාදනය මාස 3ක කාලයක් දීලා පරීක්ෂා කළා. පසුව කළ නිරීක්ෂණය අනුව සිරුරේ මේදය අඩුකළ හැකි නිෂ්පාදනයක් බව තහවුරු වෙලා තිබෙනවා. ඒ අනුව සිරුරේ ආහාර ජීර්ණ පද්ධතියේ ක්‍රියාකාරීත්වය සක්‍රිය මට්ටමකට ගෙන ඒමට ක්‍රියාත්මක වී තිබෙනවා. ඉන්දියාවේ ආයුෂ් ජාත්‍යන්තර සඟරාවෙහි මෙම පර්යේෂණ පත්‍රිකාව පිළිබඳව පළ කර තිබෙනවා.”
නව නිෂ්පාදන හඳුන්වාදීම හේතුවෙන් සේවකයන් සඳහා ඇතිවන රැකියා අවස්ථා සැලකිය යුතු ලෙස ධනාත්මක වේ. නව නිපැයුම් සහ නවෝත්පාදනයන් ආර්ථික වර්ධනයට සහ රැකියා උත්පාදනයට සෘජුවම දායක වන බව සඳහන් කළ යුතුය. මේ අනුව නව නිෂ්පාදන හඳුන්වාදීම ශක්තිමත් රැකියා උත්පාදකයකි. සේවකයන් නව නිපුණතාවලින් සන්නද්ධ වීම අනාගත ආර්ථිකය සඳහා ද වැදගත් වේ.
“දැනට අපේ කර්මාන්ත ශාලාවේ 86 දෙනෙක් පමණ පිරිසකට රැකියා අවස්ථා ලබා දීලා තිබෙනවා. ඊට අමතරව නිෂ්පාදන අමුද්‍රව්‍ය ලබාදීම සම්බන්ධයෙන් 170ක් පමණ පිරිසක්, විශේෂයෙන් ග්‍රාමීය කාන්තාවන් පිරිසකට අප සමඟ එක්ව වැඩ කිරීමට අවස්ථාව ලබා දීලා තිබෙනවා. ඒ නිසා ඔවුන්ගේ පවුල් නඩත්තු කරන්න අමතර ආදායමක් ඔවුන්ට ලබාගන්න හැකිවී තිබෙනවා. මේ අය ලංකාව වටේ විසිරිලා ඉන්නවා. අපිට ගුණාත්මක අමුද්‍රව්‍ය සපයනවා.”
වෙදගෙදර ආයුර්වේද ඖෂධ නිෂ්පාදන කර්මාන්තය සාම්ප්‍රදායික දැනුම සහ නවීන තාක්ෂණය ඒකාබද්ධ කරමින් දේශීය හා විදේශීය වෙ‍ෙළඳපොළ ඉලක්ක කරගත් තිරසර ව්‍යාපාරයක් ලෙස වර්ධනය වෙමින් පවතියි. එය ලාභ අරමුණ කර ගත් ව්‍යාපාරයකට එහා ගිය සමාජ සේවය ඉටු කිරීමක් වශයෙන් සඳහන් කළ හැකිය.
“මේ වගේ ඉදිරියේදීත් ආයුර්වේද ඖෂධීය ද්‍රව්‍ය එළිදක්වන්න බලාපොරොත්තු වෙනවා.” යනුවෙන් අවසානයේ දී චමින්ද රූපසේන මහතා වැඩිදුරටත් ප්‍රකාශ කළා.
දිනමිණ පුවත්පත ඇසුරෙන්..
by TaboolaSponsored Links
You May Like
