“වසත් සමයක දෝතටම වැඩි නුඹ මගේ සම්මානයයි.. අදින් පසුවට සදා කල්හිම මගෙ ලොවට ගිම්හානයයි..” හැරදා ගිය පුතු වෙනුවෙන් ඇයගේ හදේ නැගුණු අපරිමිත මව් සෙනෙහස වචන කළ ඇය

ඒත් අද ඇයට ඒ හැම දෙයක්ම සිහියක් විතරයි..

රත්සර විතාන, පසුගිය දිනය මාරාන්තික පිළිකා මාරයාගේ ගොදුරක් වුණු මේ තරුණයාගේ මරණය ගැන බොහෝ දෙනා සංවේගයෙන් යුතුව කතා කළා.

ශාන්ත කුමාර විතාන සහ චන්දි කොඩිකාර යුවලගේ ආදරණීය පුතු රත්සර විතාන ජීවිතයෙන් සමුගත් දා පටන් ඔහු ගැන කම්පා නොවූ කෙනෙක් නැතුව ඇති.

ඒ පවුලට හිතවත් සියලු දෙනාම මේ මරණය ගැන කතා කලේ සංවේගයෙන් යුතුවයි. ඔහුගේ නික්මයාමෙන් දින කිහිපයකට ප්‍රවීණ ලේඛිකා චන්දි කොඩිකාර මෙන්න මේ වගේ දුක්මුසු සටහනක් ඇයගේ වචනවලින්ලියා තිබුණා.

“ඇහේ මූණේ නොහිටියා නම්
නොහඬාම සමු දෙන්න තිබුණා
සුවඳ මේ හැටි නොදැනුණානම්
ගි⁣යපු බව පිළි ගන්න තිබුණා
නුඹ මට හොරෙන් ගිය පළමු ගමනයි
මහමෙරක් තරමටම රිදුණා
හැම රුහිරු බිඳුවක්ම ගලලා
ළමැද කිරි කළ හතක් එරුණා
මගේ ලේ කිරි සුවඳ නොදැනෙන
දුරකටම නුඹ ගිහින් තිබුණා
මව් සෙනේ පිරි සිතම දෙදරා
කැබලි සිය දහසකට බිඳුණා
ඇතෙක් සරි පුතු නික්ම ගියදා
මෙතෙක් නොදැනුණ තනිය දැනුණා
සිතක් ගිනි ගෙන නැ⁣ඟෙන දුම් කඳ
මතත් නුඹෙ රූ රටා මැවුණා
වසත් සමයක දෝතටම වැඩි
නුඹ මගේ සම්මානයයි
අදින් පසුවට සදා කල්හිම
මගෙ ලොවට ගිම්හානයයි”