අපේ රටේ නව පරපුරේ ජනප්රිය ගායකයෙකු වන ශිහාන් මිහිරංග මීට වසර හයකට පමණ ඉහතදී ප්රවීණ ගායිකා ආචාර්ය නන්දා මාලිනී පිළිබඳව කළ හෙළිදරව්වක් මේ වන විට යළිත් කතාබහට ලක්ව තිබේ. වත්මන් කලාකරුවන්ට තම ප්රසංගයක් සාර්ථක කර ගැනීමට දරන්නට සිදුවන දැවැන්ත වෙහෙස සහ නන්දා මාලිනියගේ ප්රසංගවල පැවති සුවිශේෂී ස්වභාවය ඔහු එදා මනාව පැහැදිලි කර තිබුණි.
නව පරපුරේ කලාකරුවෙකුට ආසන 1500 ක පමණ ප්රසංග ශාලාවක් ‘House Full’ එකක් කර ගැනීමට මාස තුනකට ආසන්න කාලයක් දැවැන්ත ප්රචාරණ කටයුතු (Campaign) කරන්නට සිදු වන බව ශිහාන් පවසා ඇත. ආලෝකකරණය (Lights) සහ වාද්ය මණ්ඩලය (Bands) සඳහා අති විශාල මුදලක් වැය කරමින්, දැඩි පරිශ්රමයක් දැරීමට සිදුවන බව ඔහු පෙන්වා දී තිබේ.
නමුත් නන්දා මාලිනීගේ ප්රසංගවල සැබෑ තත්වය මීට සම්පූර්ණයෙන්ම වෙනස් වූ බව ඔහු සඳහන් කර ඇත. කිසිදු අතිරික්ත ප්රචාරණයකින් තොරව, ඇය ඉතා සරලව කොණ්ඩය බැඳගෙන ප්රසංගය සඳහා පැමිණෙන විට, ශාලාව තුළ වාඩි වීමට ආසන පවා නොමැතිව ප්රේක්ෂකයින් ආපසු හැරී ගිය අවස්ථා තිබූ බව ශිහාන් ප්රකාශ කර තිබුණි.
මීට වසර හයකට පෙර ඔහු විසින් පවසන ලද මේ සත්ය කතාව, අදටත් නන්දා මාලිනී නමැති අසහාය කලාකාරිනියගේ සැබෑ ජනප්රියත්වය සහ රසික ආදරය කියාපාන කදිම කැඩපතක් වී තිබේ.
