ශ්‍රී ලංකාවට ආසන්නයෙන් පැවති ගැඹුරු අවපීඩන කලාපය අද (27) පස්වරුවේ මීට සුළු වේලාවකට පෙර සුළි කුණාටුවක් දක්වා වර්ධනය වී ඇති බව කාලගුණ විද්‍යා දෙපාර්තමේන්තුව පවසනවා.
ඒ අනුව එම සුළි කුණාටුව “දිත්වා” ලෙස නම් කර ඇති බවයි කාලගුණ විද්‍යා දෙපාර්තමේන්තුවේ නියෝජ්‍ය අධ්‍යක්ෂිකා ප්‍රීතිකා ජයකොඩි පවසා සිටියේ.
දකුණු මුහුද ආශ්‍රිතව වායුගෝලයේ පැවති කැළඹිලි ස්වභාවය 25 වැනිදා අඩු පීඩන කලාපයක් බවට පරිවර්තනය වූ බවත්, 26 වැනිදා පීඩන අවපාතයක් බවට පත්වී, අද (27) උදෑසන ගැඹුරු පීඩන අවපාතයක් බවට පත්වූ බව ඇය සඳහන් කර සිටියා.
එම තත්ත්වය මේ වන විට සුළි කුණාටුවක් දක්වා වර්ධනය වී ඇති බවත්, මෙහි බලපෑම නිසා ඉදිරි දින කිහිපයේද දැඩි වර්ෂා තත්ත්වයක් පැවතිය හැකි බවත්, කාලගුණ විද්‍යා දෙපාර්තමේන්තුවේ ඉදිරි නිවේදන පිළිබඳව දැඩි අවධානයෙන් පසුවන ලෙසයි එම දෙපාර්තමේන්තුවේ නියෝජ්‍ය අධ්‍යක්ෂිකා ප්‍රීතිකා ජයකොඩි වැඩිදුරටත් පවසා සිටියේ.
