රටක නීතිය හා සාමය සුරැකීම උදෙසා තම ජීවිතයම කැප කරන පොලිස් නිලධාරිනියකගේ දෛනික අභියෝගාත්මක රාජකාරිය දරුවෙකු දකින්නේ කෙසේද? බොහෝ විට එය භීතියක් හෝ දැඩි විනයක් සහිත අත්දැකීමක් විය හැකියි. නමුත් මහනුවර ප්රදේශයේ චලන ආකාශ් නම් තරුණයා දකින්නේ එය තමාගේ ජීවිතයේ ආදර්ශය ලෙසයි.
කුඩා කල සිටම තම මව පොලිස් නිල ඇඳුමින් සැරසී රට වෙනුවෙන් ඉටු කරන උතුම් මෙහෙවර දෙස ආඩම්බරයෙන් බලා සිටි චලන, අද වන විට එම නිල ඇඳුමේ ගෞරවය තමාගේම කරගෙන මවගේ අඩිපාරේ යන්නට තරම් වාසනාවන්ත වී තිබෙනවා. සමාජ මාධ්ය ඔස්සේ මේ දිනවල බොහෝ දෙනෙකුගේ ආදරය දිනාගෙන ඇති මෙම මව සහ පුත්රයාගේ ඡායාරූපය සැබවින්ම කියාපාන්නේ හෘදයාංගම කතාවක්.
සිය මව්පියන්ගේ ආශිර්වාදය මෙන්ම ඔවුන්ගේ වෘත්තීය ජීවිතයේ ආදර්ශය ද දරුවෙකුගේ අනාගත මගපෙන්වීම කෙරෙහි කොතරම් බලපෑමක් සිදු කරනවාද යන්නට මෙය කදිම නිදසුනක්. මවක් දැරූ වෙහෙස සහ ඇය ලබා දුන් යහපත් ආදර්ශය නිසාම, අද ඇයගේම ලේ සහ මස්වලින් සැදුම්ලත් පුත්රයා ද එම පොලිස් දෙපාර්තමේන්තුවටම එක්වී මව ළඟින්ම සිටිමින් රටට සේවය කිරීමට ඉදිරිපත්වීම සැබැවින්ම ආඩම්බර විය යුතු කරුණක්.
“අම්මා පෙන්නපු හරි පාරේ ඇවිත්” යන කියමන ප්රායෝගිකව සනාථ කරමින්, එකම අරමුණක් වෙනුවෙන් එකම නිල ඇඳුමකින් සැරසී මව සහ පුතා රට රකින්නට පියනගන මෙම සුන්දර මොහොත, රටටම ආදර්ශයක් වන අතර මෙවැනි දරුවන් බිහි කරන මව්පියන් රටේම සම්පතක්.
