අපෙන් සදහටම සමුගත් ශ්‍රී ලංකාවේ දළ රජවරු – ඔවුන්ගේ නොකියූ කතාව 🐘💔😞
ලංකාවේ අලි 7000ක් විතර ඉන්නවා. ඒත් ඒ 7000න් දළ තියෙන පිරිමි අලි ඉන්නේ 5% – 6%ක් වගේ සුළු ප්‍රමාණයක් විතරයි. ඒ නිසා දළ ඇතෙක් කියන්නේ සතෙක් නෙවෙයි, ජීවමාන පුරාවෘත්තයක්.
වනයේ අභිමානය, සංචාරක කර්මාන්තයේ තරුව, අපේ පාරම්පරික උරුමය. ඒත් පහුගිය අවුරුදු 20 ඇතුලත අපිට ඒ උරුමයෙන් ලොකු කොටසක් නැතිවෙලා.
මේ හැම මරණයක් පිටිපස්සෙම තියෙන්නේ එකම කතාවයි – වෙඩි උණ්ඩයක්, නීතිවිරෝධී විදුලි රැහැනක්.
🕯️ 01. භාතිය – නිකවැරටියේ තනිකඩයා
📅 මියගියේ: 2025 ජූලි 15 | වයස: අවුරුදු 30-35
නිකවැරටිය, ආඬියාගල කැලේ හැමෝම දන්න නමක් තමයි භාතිය. උස, තේජස නිසා නෙවෙයි, එයාගේ අහිංසකකම නිසා. ගම්මුන් කියන විදියට කවදාවත් වගාවකට, මිනිහෙක්ට කරදරයක් කරලා නෑ.
2024 අග භාගයේ දී දඩයක්කාරයෙක්ගේ වෙඩි පහරක් ඔහුගේ ඉදිරි පාදයට වැදුනා. තුවාලයත් එක්කම මාස 8කට වඩා කැලේ ඇතුලේ ඇවිද්දා. වනජීවී පශු වෛද්‍යවරු බෙහෙත් කරන්න ගියාම කැලේටම දුවනවා.
අවසානයේ ජූලි 14 වෙනිදා දුර්වල වෙලා වළකට වැටුණා. පැය 24ක් පුරාම දොස්තරලා බේරගන්න උත්සාහ කළත්, තුවාලය සැරවීම නිසා ඇතිවුණ විෂ වීම නිසා හදවත නතර වුණා. ඔහුගේ දළ දෙක නම් කිසිවෙක් අරන් තිබුණේ නෑ. ඒකම ඔහුගේ අහිංසකකමට සාක්ෂියක්.
🕯️ 02. දීඝදන්තු 01 – කලා වැවේ රජු
📅 2024 නොවැම්බර් 27 | වයස: 45-50
නමේ හැටියටම දළ දෙක බිමටම වගේ දිගයි. කලා වැව, කහල්ල-පල්ලේකැලේ රජ කරපු දැවැන්තයා. වනජීවී ඡායාරූප ශිල්පීන්ගේ සිහින තරුව.
ඔහු මියගියේ ගොවියෙක් කුඹුරක් වටේ දාලා තිබ්බ, සෘජුවම ප්‍රධාන විදුලි රැහැනට සම්බන්ධ කරපු නීතිවිරෝධී රැහැනකට අහු වෙලා. වෝල්ට් 23000ක සැරයක්. එතනම මියගිහින් තිබුණා. පශ්චාත් මරණ පරීක්ෂණයේදී හෘදය අකර්මණ්‍ය වීම ලෙස සඳහන් වුණා. ඒ වගා බිමේ අයිතිකරු අත්අඩංගුවට ගත්තා, ඒත් දීඝදන්තු ආයේ එන්නේ නෑ.
🕯️ 03. බරණ – නාමල් උයනේ කඩවසම් තරුණයා
📅 2022 ජූලි | වයස: 40-45
බරණ කියන්නේ නාමල් උයන, කලා වැව ආශ්‍රිතව හිටපු තවත් සුපිරි නළුවෙක්. හැමදාම පිරිසිදුවට ඉන්න, දළ දෙක උස්සගෙන යන විදිය නිසා ඡායාරූප ශිල්පීන් අතර ජනප්‍රියයි.
ඔහුත් බිලිවුණේ ඒ විදියේම මාරක විදුලි උගුලකට. වගාබිමක් ආරක්ෂා කරන්න දාපු රැහැනක්. වනජීවී නිලධාරීන් එනකොටත් සිරුර පිලිස්සිලා තිබුණා.
🕯️ 04. රේවත – කලා වැවේ අහිංසකයා
📅 2021 මාර්තු 09 | වයස: 45-55
රේවත ගැන ගම්මුන් කියන්නේ වෙනම කතාවක්. කලා වැව – බලලු වැව ප්‍රදේශයේ හිටපු ප්‍රසිද්ධම ඇතා උනත්, කවදාවත් ගමකට ඇවිත් කරදරයක් කරලා නෑ කියලා වාර්තා වෙලා නෑ.
ඔහුගේ මරණය තමයි වනජීවී ලෝලීන්ව වැඩිපුරම කම්පා කළේ. මොකද මිනිස්සුන්ට කරදරයක් නොකරපු සතෙක්ව මරන්න තරම් අපි කුරිරුද කියලා.
🕯️ 05. සංඛ – කාවන්තිස්සගේ හොඳම යාළුවා
📅 2022
මින්නේරියේ කාවන්තිස්ස නිතරම දකින්න ලැබුණේ සංඛ එක්ක. තරුණ, දඟකාර දළ ඇතෙක්. මීට අවුරුද්දකට විතර කලින් වෙඩි වැදිලා දකුණු පාදය ආබාධිත වෙලා තිබුණා. ඒ නිසා ඇවිදිනකොට පැහැදිලිවම කොර ගහනවා.
ඒ ආබාධය නිසාම ඉක්මනට දුවන්න බැරිව, පරණ මඩ වළකට වැටිලා ගොඩ එන්න බැරිව පැය ගණනක් ඉඳලා තමයි මියගිහින් තියෙන්නේ.
🕯️ 06. යුනිකෝන් – තනි දළයෙන් ලස්සන වූ තරුව
📅 2025 මාර්තු | වයස: 40-45
එක් දළයක් කැඩිලා, අනිත් දළය විතරක් තිබ්බ නිසයි “යුනිකෝන්” කියලා නම වැටුණේ. ඒ අඩුපාඩුවම තමයි ඔහුව වඩාත්ම ලස්සන කළේ. මින්නේරිය, කවුඩුල්ලේ ජීප් රියදුරන්ගේ, සංචාරකයන්ගේ ෆේවරිට්.
කටුකැලියාව කැලේදී වෙඩි තබා ඝාතනය කරලා දාලා තිබියදී තමයි සිරුර හම්බවෙන්නේ. දළය කපාගෙන යන්න හදලා තිබුණා. වෙඩි තැබීම දළ සඳහාම කළ ඝාතනයක් බවට සැක කෙරෙනවා.
🕯️ 07. කොලිය – මතකයේ ඉතිරි වූ තරුණයා
📅 2024 දෙසැම්බර්
මින්නේරියේ සැරිසැරූ තරුණම දළ ඇතුන්ගෙන් කෙනෙක්. තාම දළ දෙක සම්පූර්ණයෙන්ම ලොකුවෙලා නැති, ඒත් ලස්සනට වැවෙන කොලු ගැටයෙක්.
සති ගණනක් පරණ වෙච්ච, දිරාපත් වෙච්ච සිරුරක් විදියට තමයි හම්බවෙන්නේ. පරීක්ෂණ වලින් තහවුරු වුණේ වෙඩි තුවාල කිහිපයක් නිසා ඇතිවූ ආසාදන තත්ත්වයක් නිසා මියගිහින් කියලා.
🕯️ 08. කුමන හරස් දළ ඇතා – දුර්ලභ උරුමය
📅 2007 ජනවාරි 17
දළ දෙක හරස් වෙලා තිබ්බ, ලෝකෙටම දුර්ලභ ගණයේ ඇතෙක්. කුමනේ හිටපු නිසා තමයි ඒ නම.
වෙඩි වැදී ඉස්සරහ කකුලේ ඇට දෙකම කැඩිලා, බිම වැටෙද්දී කොඳු ඇට පෙළටත් දරුණු හානියක් වෙලා. දවස් තුනක් තිස්සේ ඇදේ ඉඳන් බේරගන්න හදලා තියෙනවා. ඒත් බැරිවුණා. ඔහුගේ මරණයෙන් පස්සේ තමයි ලංකාවේ හරස් දළ ඇතුන් ආරක්ෂා කිරීම ගැන කතාබහක් ඇතිවුණේ.
🕯️ 09. පොඩි පූට්ටුවා – යාලේ පුරාවෘත්තය
📅 1980 දශකය
යාලේ හිටපු තවත් හරස් දළ ඇතෙක්. 80 දශකයේ දී දළ සඳහාම වෙඩි තබා ඝාතනය කළා කියලා පැරණි වනජීවී නිලධාරීන්ගේ වාර්තාවල තියෙනවා. ඔහුගේ දළ යුගලය අදටත් කොහේද කියලා හොයාගන්න නෑ.
🕯️ 10. පරාක්‍රම – ගල්ගමුවේ මහා රජු
📅 2010 නොවැම්බර් 23 | උස අඩි 9, දළ අඩි 5+
මේ ලිස්ට් එකේ අතිවිශිෂ්ටයා. ගල්ගමුවේ මිනිසුන් “මහා ඇතා” කියලා බයත්, ගෞරවත් එක්ක හඳුන්වපු ඇතා. ඔහුගේ දළ දෙකේ සමමිතික බව, උස, ඒක දැකපු කෙනෙක්ට අමතක වෙන්නේ නෑ.
2010 දී ගල්ගමුවේදී මිනිස් මරණයක් වාර්තා වීමත් එක්ක ඔහුව අල්ලලා වෙන කැලයකට ගෙනියන්න තීරණය කළා. ඒක සාමාන්‍ය ක්‍රියා පටිපාටිය.
අවාසනාවන්තම දේ වුණේ එතකොටයි. ඔහුව දාලාගෙන ගිය ලොරියේ ලෑලි තට්ටුව කැඩිලා, ඔහුගේ පිටිපස කකුලක් ඒ අස්සේ හිරවෙලා. ටොන් 5ක විතර බරක් තියෙන සතෙක් පැය ගණනක් ඒ විදියට දඟලද්දී ඇතිවූ අධික පීඩනයෙන්, වේදනාවෙන් හදවත නතර වෙලා.
පශු වෛද්‍ය වාර්තාවේ තිබුණේ “Transportation Stress Induced Cardiac Failure” කියලා. එහෙම නැත්තම් මිනිස්සු හදපු ප්‍රවාහන ක්‍රමයේ වරදින් සිදුවූ මරණයක්.
අපිට මොකද කරන්න පුළුවන්?
1. දකින තැනක නීතිවිරෝධී විදුලි රැහැනක් දැක්කොත් 1992ට කතා කරන්න. Photo එකක් ගන්න එපා, ලංවෙන්නත් එපා.
2. වෙඩි ශබ්දයක් ඇහුනොත්, වනජීවී කාර්යාලයට දැනුම් දෙන්න.
3. මේ පෝස්ට් එක Share කරන්න. ගමේ ගොවියෙක් දැක්කත්, නගරේ ළමයෙක් දැක්කත්, දළ ඇතෙක්ගේ වටිනාකම දැනගන්න ඕන.
අද භාතිය නෑ. හෙට කාවන්තිස්ස නැතිවෙන එක නවත්තන්න පුළුවන් අපිට විතරයි.
ඔවුන් නැතිව වනාන්තර පාලුයි. ඔවුන්ව රැකගමු.
කාවන්තිස්ස ඇඳ වැටිලා ඉන්නවා දැක්කම, අපට අහිමි වූ අනිත් රජවරු ටික මතක් වුණා…
සටහන ayaletravel
චායාරූප අන්තර්ජාලයෙනි
