අකුරැස්ස, දියලපේ ප්රදේශයේ පදිංචිව සිටි විසිපස් හැවිරිදි ටෙරන්ස් ලක්මාල් සිය එදිනෙදා වැඩකටයුතු නිමවා යතුරුපැදියෙන් නිවසට එමින් සිටියදී මෙලෙස අකාලයේ ජීවිතක්ෂයට පත්වූයේ කිසිවකු නොසිතූ මොහොතකය. ලංගම බස් රථයක් සමඟ අසීමිත වේගයෙන් ධාවන තරගයක යෙදුණු පෞද්ගලික බස් රථයක් ඔහුගේ යතුරුපැදියේ මුහුණට මුහුණ ගැටීමෙන් මෙම මාරාන්තික අනතුර සිදුව තිබේ.
මේ වන විට මියගිය ලක්මාල්ගේ පවුල මුහුණ දී ඇත්තේ අතිශය අභාග්යසම්පන්න ඉරණමකටය. මීට දින දෙකකට පසු එනම් 16 වන දින ඔහුගේ විවාහය ලියාපදිංචි කිරීමට සියල්ල සූදානම් කර තිබී ඇත. එපමණක් නොව, තවත් දින තුනකින් (17 වැනිදා) රැකියාව සඳහා ඊශ්රායලය බලා පිටත්ව යාමටද ඔහු සිය ගමන් මලු සූදානම් කරමින් සිටියේය. එහෙත්, මහමඟ රියදුරන්ගේ අමනෝඥ ධාවන තරගයක් නිසා ඒ සියලු සිහින සහ බලාපොරොත්තු ක්ෂණිකව අළුමී වී ගොස් තිබේ.
එම අතිශය සංවේදී පුවත දරාගත නොහැකි වූ ලක්මාල්ගේ මව හෘදයේ ලේ කැටියක් සිරවීම හේතුවෙන් (Acute Myocardial Infarction / Coronary Thrombosis) දැඩි ලෙස අසාධ්ය වී ඇති අතර, ඇය මේ වන විට මාතර මහ රෝහලේ දැඩි සත්කාර ඒකකයේ (ICU) ජීවිතයත් මරණයත් අතර සටනක යෙදී සිටියි. අනෙක් අතට, ලක්මාල්ගේ දේහය නිවසට ගෙන ඒමටත් මත්තෙන් සැකකාර බස් රියදුරු මුදාහැර ඇති බවට පවසමින් ඥාතීන් සහ ප්රදේශවාසීන් දැඩි නොසන්සුන්තාවයක් සහ විරෝධයක් පළ කර තිබුණි. පසුව නීතිමය ක්රියාමාර්ග යටතේ රියදුරු මාතර මහෙස්ත්රාත් අධිකරණයේ වැඩබලන මහෙස්ත්රාත්වරයා හමුවට ඉදිරිපත් කිරීමෙන් අනතුරුව ඇප මත මුදාහැර ඇති අතර, ඔහුගේ රියදුරු බලපත්රය වහාම ක්රියාත්මක වන පරිදි අත්හිටුවා අධිකරණ භාරයට ගෙන ඇත.
මහමඟ රීති කඩමින් තත්පරයක වේගය වෙනුවෙන් මිනිස් ජීවිත පලිහට තබාගන්නා රියදුරන්ට මෙම ඛේදවාචකය කදිමට කියාපාන්නේ කටුක පාඩමකි.
