දරුවෙක් තම මව්පියන් වෙනුවෙන් පෙනී සිටිනවා කියන්නේ ආත්ම ශක්තිය ප්රදර්ශනය වන අවස්ථාවක්. අම්බලන්ගොඩ ප්රදේශයෙන් වාර්තා වන මේ සිදුවීමත් හරියටම ඒ වගේ හැඟුම්බර සහ ගැඹුරු තැනක පිහිටන කතාවක්. හැඳුනුම්පත ළඟ නැහැ කියන චෝදනාව මත වයස්ගත පියෙකුට පොලිසියෙන් අමානුෂික ලෙස පහර දී ඇති බවටයි තොරතුරු වාර්තා වන්නේ.
මේ සිද්ධියෙන් අන්ත අසරණ වුණු අවස්ථාවක, එම පියාගේ පුත්රයා කිසිදු බියකින් තොරව එම ස්ථානයට ගොස් සමාජ මාධ්ය ඔස්සේ සජීවී විකාශයක් (live) ආරම්භ කරමින් පොලිසියෙන් ප්රශ්න කරන්නට පටන් ගෙන තිබෙනවා. “ඇයි මගේ තාත්තට මෙහෙම කළේ?” කියන සාධාරණ පැනය නගමින් ඔහු තනිවම ඉදිරියට ගිය ඒ මොහොත බොහෝ දෙනාගේ කතාබහට ලක් වුණා.
විශේෂයෙන්ම සඳහන් කළ යුතු වන්නේ මේ පියා හෘද රෝගියෙක් (Heart patient) බවයි. ඔහු ඒ සඳහා නිරන්තරයෙන් ලබා ගන්නා ඖෂධවල බලපෑම නිසා, ශරීරයේ රුධිර වහනය වීමක් සිදුවුවහොත් එය පහසුවෙන් නතර වන්නේ නැහැ. සැකපිට හෝ අත්අඩංගුවට ගත් අයෙකුට මෙවැනි සෞඛ්ය තත්ත්වයක් තිබියදී පහර දීම අතිශයින්ම බරපතළ සහ සංවේදී කාරණයක්. වාර්තා වන අයුරින් අදාළ රුධිර වහනය වීම 24 වැනි දින රාත්රී 9 සිට පසුදින (25 වැනි දින) උදේ 11 වන තෙක්ම නතර වී තිබී නැහැ.
නීතිය ක්රියාත්මක කළ යුතු ආයතනයකින්ම පුරවැසියන්ගේ මූලික මිනිස් අයිතිවාසිකම් සහ ජීවත් වීමේ අයිතිය මෙලෙස උල්ලංඝනය වීම කිසිසේත් අනුමත කළ නොහැකියි. මේ අමානුෂික ක්රියාවට වගකිව යුතු අම්බලන්ගොඩ පොලිසියේ අදාළ නිලධාරීන්ට එරෙහිව දැඩි විනය ක්රියාමාර්ග ගනිමින් වහාම ඔවුන්ගේ සේවය අත්හිටුවනු ඇතැයි අපි බලාපොරොත්තු වෙනවා.
මෙවැනි අසාධාරණකම් හමුවේ නිහඬ නොවී නැගී සිටි ඒ පුත්රයාට අපේ ප්රණාමය හිමි විය යුතු අතරම, මේ රටේ සාමාන්ය පුරවැසියාට යුක්තිය ඉටු වන තුරු අප සැමගේ හඬ එකතු විය යුතුව තිබෙනවා.
