ස්වාභාවික විපත් කියන්නේ රටක ආර්ථිකයේ තරම හෝ දුප්පත් පොහොසත්කම බලලා සිදුවෙන දෙයක් නෙවෙයි. නේපාලයේ රසුවා දිස්ත්රික්කය ඇතුළු ප්රදේශ කිහිපයක භෝතේකෝෂී ගංගා ද්රෝණිය කේන්ද්ර කරගනිමින් හටගත් දැවැන්ත හිම නායයෑම් සහ ජල ගැලීම් නිසා මේ වන විට මුළු රටම දැඩි උවදුරකට මුහුණ දී සිටිනවා. ජීවිත මෙන්ම විශාල දේපළ හානියක්ද වාර්තා වන මේ අභියෝගාත්මක මොහොතේදී, විපතට පත් නේපාල ජනතාවට සහයෝගය දැක්වීම සඳහා ශ්රී ලංකා රජය විසින් අමෙරිකානු ඩොලර් මිලියනයක හදිසි මූල්ය ආධාරයක් ලබා දීමට පියවර ගෙන තිබීම සැබවින්ම අගය කළ යුත්තක්.
ජනාධිපති අනුර කුමාර දිසානායක මහතාගේ උපදෙස් මත ක්රියාත්මක වූ විදේශ කටයුතු, විදේශ රැකියා සහ සංචාරක අමාත්යාංශය මෙම නිල තීරණය ප්රකාශයට පත් කළ අතර, විදේශ කටයුතු අමාත්ය විජිත හේරත් මහතා නේපාල විදේශ අමාත්ය ශිෂීර් ඛනාල් මහතා සමඟ දුරකථනයෙන් සම්බන්ධ වෙමින් ශ්රී ලංකාවේ බලවත් ශෝකය මෙන්ම සහයෝගය පළ කළා. ඒ වගේම, ආපදා කළමනාකරණ මධ්යස්ථානය හරහා අවශ්ය වුවහොත් ක්ෂේත්රයේ සහන සහ මුදාගැනීමේ කටයුතුවලට ද දායක වීමට අපේ රට සූදානම් බවයි ඒ හරහා දැනුම් දී තිබෙන්නේ.
ශ්රී ලංකාව සහ නේපාලය අතර ඇත්තේ සියවස් ගණනාවක ගැඹුරු ආගමික, සංස්කෘතික සහ රාජ්ය තාන්ත්රික සබඳතාවක්. විශේෂයෙන්ම මීට පෙර අපේ රටේ ඇති වූ දරුණු ස්වාභාවික ආපදා අවස්ථාවලදී කිසිදු පැකිලීමකින් තොරව සහන සැලසීමට නේපාලය ඉදිරිපත් වූ අයුරු මෙන්ම, 2015 නේපාල භූමිකම්පා සමයේදී ශ්රී ලංකාව පෙරමුණ ගෙන වෛද්ය සහ සහන කණ්ඩායම් එළවමින් ලබා දුන් දායකත්වය අදටත් අපේ මතකයේ තිබෙනවා.
අපේ රටත් ආර්ථික අභියෝගවලින් සම්පූර්ණයෙන්ම මිදී නැති මේ වැනි කාලවකවානුවක පවා, අමාරුම කාලවලදී ළඟින් සිටි මිත්ර රටක දුකේදී අත්වැල් බැඳගැනීම මනුෂ්යත්වයේ කදිම නිදසුනක්. ලෝකය කොතරම් තාක්ෂණයෙන් දියුණු වුණත්, මෙවැනි ස්වභාවික ව්යසන හමුවේ අප සැවොම කළ යුත්තේ එකිනෙකාගේ අත් අල්ලාගෙන මේ අභියෝග ජය ගැනීමයි.
