වැරදි විදියට නිදාගෙන ලෙඩ ගොඩක් හදාගන්න එපා! දවල් නින්ද ගැන දැනගන්න මේක අනිවාර්යයෙන්ම කියවන්න.
අපි කවුරුත් ආසයිනේ දවල්ට බත් ටිකක් කාලා ටිකක් වෙලා ඇලවෙන්න. හැබැයි මේ දවල් නින්ද හැමෝටම එක වගේ ගුණ දෙන්නේ නැහැ කියන කතාව ඔබ දන්නවාද? වෛද්‍ය එම්. කේ. එන්.ජී. සඳුන්ගම මහතා පෙන්වා දෙන විදියට, ආයුර්වේදයේ එන චරක සංහිතාවට අනුව අපි ගන්න කෑම වගේම අපේ නින්දත් අපේ මහත, කෙට්ටු බව සහ නිරෝගීකම තීරණය කරන ප්‍රධානම සාධකයක් වෙනවා. දවල් නින්ද සමහරුන්ට අමෘතයක් වෙද්දී, තවත් අයට ඒක ලෙඩ ගොඩක් කැඳවන වසක් වෙනවා.
ඔබ දවල් නින්දට කැමති කෙනෙක් නම්, ඊට කලින් අනිවාර්යයෙන්ම දැනගෙන ඉන්න ඕන කරුණු ටික තමයි මේ.
දවල් නින්ද ගුණදායක වෙන්නේ කාටද?
පාඩම් වැඩ කරන අයට, මහන්සි වෙලා බර වැඩ කරන අයට වගේම දුර ගමන් ගොස් වෙහෙස වුණු අයට දවල් නින්ද ගොඩක් ගුණදායකයි.
කුඩා දරුවන්ට, වයසක අයට, ශරීරය දුර්වල වුණු අයට වගේම වාහන පදවලා රෑ නිදිමරපු අයටත් දවල්ට නිදාගන්න එක හොඳයි.
තරහෙන්, දුකින් හෝ බයෙන් පෙළෙන අයට වගේම මානසික ආබාධ තියෙන අයට දවල් නින්දෙන් ලොකු සහනයක් ලැබෙනවා.
අජීර්ණ, ක්ෂය රෝග, හතිය, හික්කාව සහ අතීසාරය වගේ රෝග තියෙන අයටත් මේක සුදුසුයි.
විශේෂම දේ: දැඩි රස්නයක් තියෙන ග්‍රීෂ්ම කාලයේදී විතරක් ඕනෑම කෙනෙකුට දහවල් කාලයේ නිදාගැනීම සුදුසුයි කියලා තමයි ආයුර්වේදයේ කියන්නේ. මොකද ඒ කාලෙට දහවල වැඩි නිසා ඇඟ රළු වෙනවා.
දවල්ට නිදාගැනීම නරක කාටද?
සෙම් බහුල ශරීර තියෙන අයට වගේම පීනස වගේ සෙම් රෝග (කඵජ රෝග) තියෙන අයට දවල් නින්ද කොහෙත්ම සුදුසු නැහැ.
අධිකව තරබාරු අයට (මේදස් බහුල අයට) දවල් නින්ද අහිතකරයි. ග්‍රීෂ්ම කාලයේ හැර අනිත් කාලවල දවල්ට නිදාගත්තොත් සෙම සහ පිත කෝප වෙනවා.
දවල් නින්ද නුසුදුසු කෙනෙක් පුරුද්දක් විදියට දවල්ට නිදාගත්තොත් ලොකු අමාරුවක වැටෙන්න පුළුවන්. ඒකෙන් ඔළුවේ කැක්කුම, ඇඟපත වේදනාව, ඉදිමුම, කෑම අරුචිය, පීනස, කැස්ස, උගුරේ අමාරු වගේම ඇඟේ කැසීම් සහ බිබිලි දැමීම වගේ රෝග පවා ඇතිවෙන්න පුළුවන්. ඒ විතරක් නෙවෙයි, මතක ශක්තිය සහ බුද්ධිය හීන වෙලා ශරීර ශක්තියත් දුර්වල වෙනවා.
අධිකව කෑම කන එකයි, අධිකව නිදාගන්න එකයි තමයි ශරීරය තරබාරු වෙන්න බලපාන ප්‍රධානම දේවල් දෙක. ඒ නිසා අද ඉඳන් දවල්ට නිදාගන්න කලින් ඔයා අයිති වෙන්නේ දවල් නින්ද හොඳ අයටද, නැත්තම් නරක අයටද කියලා දෙපාරක් හිතලා බලන්න!
