තට්ටේ පෑදෙන එකට තිත! දින 28න් කෙස් වවන චීනයේ අලුත්ම මැජික් පනාව මෙන්න!
වයසට යද්දී විතරක් නෙමෙයි, දැන් ඉතින් තරුණ කාලේදීම කොණ්ඩේ යන එක, තට්ටේ පෑදෙන එක ගොඩක් අයට තියෙන ලොකුම මානසික ප්රශ්නයක්නේ. කොණ්ඩේ වවාගන්න එක එක ජාතියේ තෙල්, බෙහෙත්, ෂැම්පු ගාලා ඇති වෙලා ඉන්න අයට බලාපොරොත්තුවක් දෙන සුපිරිම ආරංචියක් චීනයෙන් වාර්තා වෙනවා.
දින 28ක් වගේ හිතාගන්න බැරි කෙටි කාලයකින් නැවත හිසකෙස් වර්ධනය කරන්න පුළුවන් අපූරු “විද්යුත් පනාවක්” චීන විද්යාඥයන් පිරිසක් විසින් නිපදවලා තියෙනවා.
චීනයේ බීජිංහි බෙයිහාං විශ්වවිද්යාලයේ පර්යේෂකයන් සහ හොංකොං නගර විශ්වවිද්යාලයේ විද්යාඥයන් එකතු වෙලා තමයි ‘ඩිටැංගල්’ කියලා නම් කරපු මේ අපූරු පනාව හදලා තියෙන්නේ.
අපි සාමාන්යයෙන් ඔළුව පීරනවා වගේ මේ පනාවෙන් හිස පීරද්දී, ඒකේ තියෙන කුඩා ඉලෙක්ට්රෝඩ සහිත විශේෂ දත්වලින් ඉතාම මෘදු විද්යුත් ස්පන්දන ජනනය වෙනවා. ඒ වගේම මේ පනාව මඟින් කෙස් කළඹේ මුල්වලටම අවශ්ය ප්රතිකාරක අණු කෙළින්ම ලබා දෙනවා. විද්යුත් උත්තේජනය නිසා මේ ඖෂධීය අණු සම ඇතුළටම ගිහින්, කෙස් ගස් හැදෙන මුල්වලට හොඳින්ම ළඟා වෙනවා.
මේ අලුත් උපකරණය පරීක්ෂා කරලා තියෙන්නේ හිසකෙස් ගැලවී යාමේ රෝගී තත්ත්වයක් ඇති කරපු රසායනාගාර මීයන් යොදාගෙනයි. එහිදී ලැබුණු ප්රතිඵල දැකලා විද්යාඥයෝ පවා පුදුම වෙලා තියෙනවා.
දින 28ක් මේ විද්යුත් පනාවෙන් ප්රතිකාර කරපු මීයන්ගේ හිසකෙස් අහිමි වුණු ප්රදේශවලින් 97.85%ක්ම (සියයට 98කට ආසන්නව) නැවත කෙස් වැවිලා තියෙනවා!
සාමාන්යයෙන් හිසකෙස් යෑමට ලෝකයේ බහුලවම පාවිච්චි කරන ‘මිනොක්සිඩිල්’ ඖෂධය ගාපු මීයන්ගේ වැවිලා තිබුණේ 70%ක් විතරයි.
ඒ කියන්නේ දැනට ලෝකයේ තියෙන ප්රධානම බෙහෙත්වලටත් වඩා මේ විද්යුත් පනාවෙන් කෙස් වැවෙන වේගය සහ ප්රතිශතය ගොඩක් වැඩියි!
හිසකෙස් යෑමට තෙල්, ජෙල් වර්ග ගාන්න කම්මැලි අයට තමන්ගේ එදිනෙදා හිස පීරන ක්රියාවලියෙන්ම මේ ප්රතිකාරය කරගන්න පුළුවන් වෙන විදියට තමයි විද්යාඥයෝ මේක ඩිසයින් කරලා තියෙන්නේ.
හැබැයි ඉතින් මේක තාම තියෙන්නේ පර්යේෂණ මට්ටමේ. සත්තුන්ගෙන් සාර්ථක වුණාට, මිනිස්සුන්ගේ හිසකෙස් වර්ධනයට මේක කොච්චර සාර්ථකද කියලා ස්ථිරවම කියන්න තව ටික කාලයක් සායනික පරීක්ෂණ කරන්න වෙනවා කියලා විද්යාඥයෝ කියනවා. කොහොම වුණත් ළඟදීම ලෝකේ වටේම ඉන්න තට්ටේ තියෙන අයට මේකෙන් නියම විසඳුමක් ලැබෙයි කියලා හැමෝම බලාපොරොත්තු වෙනවා.










