රාජගිරිය කලපළුවාව ප්රදේශයේදී ත්රීරෝද රථ රියදුරෙකුට සවලකින් පහරදුන් බව කියන ආන්දෝලනාත්මක සිද්ධිය සම්බන්ධයෙන් අත්අඩංගුවට ගත් පිරිසට අද නීතිය දැඩිව ක්රියාත්මක වුණා.
රාජගිරිය කලපළුවාව ප්රදේශයේ සිදුවූ රිය අනතුරකින් අනතුරුව ත්රීරෝද රථ රියැදුරෙකුට සවලකින් පහරදුන් බව කියන සිද්ධියක් සම්බන්ධයෙන් වැලිකඩ පොලිසිය මගින් අත්අඩංගුවට ගෙන අධිකරණයට ඉදිරිපත් කළ නිරූපණ ශිල්පිණියකගේ පුත්රයා ඇතුලු සැකකරුවන් හය දෙනෙකු හඳුනා ගැනීමේ පෙරට්ටුවකට ඉදිරිපත් කරන තෙක් මෙම මස 16 දින දක්වා රක්ෂිබන්ධනාගාර ගත කරන ලෙස කොළඹ අතිරේක මහේස්ත්රාත් නුවන් කෞශල්ය මහතා (11) නියෝග කළා.
වැලිකඩ පොලිසිය මගින් සැකකරුවන් හය දෙනා ආවරණය කර අධිකරණයට ඉදිරිපත් කිරීමෙන් අනතුරුව මහේස්ත්රාත්වරයා එලෙස නියෝග කළා.
නිරූපණ ශිල්පිණියකගේ පුත්රයාගේ හිතවතෙකු මීට මාස කීපයකට ඉහතදී යතුරුපැදියක නැගී රාජගිරිය ප්රදේශය හරහා යමින් සිටියදී ත්රිරෝද රථයක ගැටී අනතුරක් සිදුව ඇති බවත් සිද්ධියෙන් පසු එම ස්ථානයට පැමිණි සැකකරුවන් පිරිස ත්රිරෝද රථ රියදුරුට පහරදී ඇති බවට මූලික විමර්ශනවලදී කරුණු අනාවරණය වන බවද පොලිසිය අධිකරණයට දැන්වුවා.
පහර කෑමට ලක්වූූ පුද්ගලයා කොළඹ ජාතික රෝහලට ඇතුළත්ව ප්රතිකාර ලබා ඇති බවද පොලිසිය අධිකරණයට දැන්වුවා.
පහර කෑමට ලක් වූ ත්රි රෝද රථ රියැදුරා වැලිකඩ පොලිසියට කරන ලද පැමිණිල්ලක් අනුව සැකකරුවන් පිරිස අත්අඩංගුවට ගෙන අධිකරණය වෙත ඉදිරිපත් කර තිබුණා.
මෙම සිද්ධිය මීට මාස තුනකට පමණ පෙරදී සිදුව ඇති බවත් සැකකරුවන්ගේ ඡායාරූප සමාජ මාධ්ය ඔස්සේ ප්රදර්ශනය වී ඇති බැවින් ඔවුන් පෙරෙට්ටුවකට ඉදිරිපත් නොකරන ලෙසත් ඔවුන් ඇප මත මුදා හරින ලෙසත් සැකකරුවන් වෙනුවෙන් පෙනී සිටි නීතිඥවරයා අධිකරණයෙන් ඉල්ලීමක් කළා.
පැමිණිල්ල මෙහෙයවූ පොලිසිය හා සැකකරු වෙනුවෙන් පෙනී සිටි නීතිඥවරයා අධිකරණයට දැක්වූ කරුණු සලකා බැලූ මහේස්ත්රාත්වරයා සැකකරුවන් හඳුනා ගැනීමේ පෙරෙට්ටුවකට ඉදිරිපත් කරන තෙක් එසේ රක්ෂිත බන්ධනාගාර ගත කරන ලෙසට නියෝග කළා.
