ජනාධිපති ඉදිරියේ දෑත් එක්කර “පුතේ” කියා ඇමතූ, දළදා සමිඳුන් වෙනුවෙන් වසර 69ක් හේවිසි වැයූ ජේමිස් ගුරුන්නාන්සේගේ අභිමානවත් කතාව
බලයේ තේජසට වඩා ගැමි හදවතක ඇති අව්යාජ සෙනෙහස කොතරම් සුන්දරද යන්න ශ්රී දළදා මාලිගා භූමියේදී අපට දැකගන්න ලැබුණා. ජනාධිපති අනුර කුමාර දිසානායක මහතා ඉදිරියේ බියෙන් හා ගෞරවයෙන් හිස නමාගත් දෑත් අල්ලාගනිමින් “පුතේ” කියා ආමන්ත්රණය කළ ඒ ගෞරවනීය වැඩිහිටියා අන් කවරෙකුවත් නොව, අපේ රටේ පාරම්පරික උරුමය රැකගත් ප්රවීණ කලාකරු ජේමිස් ගුරුන්නාන්සේය.
ලබන නොවැම්බර් 26 වනදාට සිය 83 වන වියට පා තබන එතුමාගේ මේ පූජනීය කලා චාරිකාව ආරම්භ වන්නේ මීට දශක කිහිපයකට පෙරයි. වයස අවුරුදු 12 තරම් පුංචි සන්ධියේදී සිය සීයා සමඟ පෙරහැරේ තාලම්පට වාදනය කරමින් මෙම රාජකාරියට එක්වූ ඔහු, 1957 වසරේ සිට අඛණ්ඩව මහනුවර ශ්රී දළදා පෙරහැරේ සහ රුහුණු කතරගම මහා දේවාලයේ හේවිසි නාද පූජාවට දායක වෙනවා. 2026 වසර වන විට වසර 69ක් පුරාවට, එනම් දශක හතකට ආසන්න කාලයක් පුරා ඔහු මෙම උතුම් මෙහෙවර නොකඩවා ඉටුකර තිබීම විශේෂත්වයක්.
දළදා සමිඳුන් උදෙසා කළ මෙම කැපවීම වෙනුවෙන් ජනාධිපතිවරුන් / රාජ්ය නායකයන් පස්දෙනෙකුගෙන්ම ඇගයීමට ලක්වීමට තරම් ඔහු භාග්යවන්ත වුණා. එමෙන්ම, ජීවිතයේ එක්වරක් පමණක් හිමිවන කලාභූෂණ රාජ්ය සම්මානයෙන්ද පිදුම් ලැබූ ජේමිස් ගුරුන්නාන්සේ, අද වන විට තමන්ගේ පුතුන් සහ මුනුබුරන්ද සමඟ එකම කණ්ඩායමේ සිටිමින් පරම්පරා තුනක පාරම්පරික කලා උරුමය ඉදිරියට රැගෙන යනවා.
පිරිපුන් වී කරලක් බිමට නැමෙන්නාක් මෙන්, මෙවැනි ප්රවීණ කලාකරුවන් තුළ ඇති නිහතමානී බව සහ අව්යාජත්වය මුළු මහත් සමාජයටම දෙන්නේ ලොකු ආදර්ශයක්. දළදා සමිඳුන් වෙනුවෙන් තමන්ගේ මුළු ජීවිත කාලයම කැපකළ මේ ශ්රේෂ්ඨ ජාතික උරුමයට දීර්ඝායුෂ ප්රාර්ථනා කරමු.
