ගෙවත්ත ලස්සන කරන්න විතරක් මල් වවන කාලයක් දැන් ඉවරයි. ආයුර්වේද වෛද්‍ය එෆ්. ශානියා සහමා මහත්මිය හෙළි කරන විදිහට, අපේම මල් වත්තේ තියෙන මල් ටිකෙන් සමේ ලස්සන රැකගන්න විතරක් නෙවෙයි, දියවැඩියාව, පිළිකා සහ අර්ශස් වගේ ලෙඩ ගොඩකටත් නියම ඔසු පිළියම් කරගන්න පුළුවන්.
රෝස මල් කියන්නේ රූපලාවණ්‍යයට විතරක් නෙවෙයි, රැයක් වතුරේ පෙඟෙන්න තියලා බිව්වහම ඇඟට ලොකු සිසිලසක් ගෙනල්ලා කුරුලෑ වදයෙන් බේරෙන්නත් උදව් වෙන සුපිරි බීමක්. ඒ වගේම ගොඩක් අයව වදින නහර ගැටගැසීමේ ප්‍රශ්නෙට දාස්පෙතියා මල් තම්බපු වතුරෙන් කකුල් තැවීම හෝ ගිතෙල් එක්ක අඹරා ගෑම මාරම ගුණයි. ඇහේ නගන ආවමත් මේ වතුර පාවිච්චි කරන්න පුළුවන්.
කාන්තාවන්ට නම් කෙසෙල් මල කියන්නේ අත්‍යවශ්‍යම ඖෂධයක්. යකඩ, පොටෑසියම් සහ තන්තු පිරුණු කෙසෙල් මල් මළබද්ධයට, තරබාරුවට, දියවැඩියාවට වගේම ඔසප් වේදනාවටත් කියාපු ඔසුවක්. කතුරුමුරුංගා මල්වල පිළිකා මර්දන ගුණ වගේම ඇස් සහ ස්වසන රෝග සුව කරන හැකියාව තියෙනවා. සියඹලා මල්වලින් කෑම රුචිය වැඩි කරලා අර්ශස් සහ මළබද්ධය දුරු කරන්න පුළුවන්.
සම පැහැපත් කරගන්න අශෝක මල් සහ නෙළුම් මල් පෙති යුෂ භාවිතයෙන් වියපත් වීම පාලනය කරලා මනස්කාන්ත සමක් ලබාගන්න පුළුවන්. අර්ශස් සහ පිළිස්සුම් තුවාල වැනි දේවලට මලිත මල් කුඩු සහ පින්න මල්වලින් ලැබෙන්නේ පුදුම සහනයක්.
ගෙවත්තේ නිකන් පිපිලා පරවෙන මල්වල මෙච්චර ගුණ තියෙනවද කියලා ඔයාලත් පුදුම වෙයි. අත් බෙහෙත් විදිහට මේවා පාවිච්චි කරනකොට වෛද්‍ය උපදෙස් ගන්නත් අමතක කරන්න එපා!
