කටුනායක ගුවන්තොටුපළ වෙත ඊශ්රාලයේ සේවය කරන සිය සහෝදරයා රැගෙන ඒම සඳහා ගමන් කරමින් සිටි දක්ෂ කේක් නිර්මාණ ශිල්පිනියක, දක්ෂිණ අධිවේගී මාර්ගයේදී සැප්තැම්බර් 16 වන අඟහරුවාදා අලුයම සිදු වූ රිය අනතුරකින් ජීවිතක්ෂයට පත්ව තිබේ. මෙම අනතුරෙන් මියගොස් ඇත්තේ තවලම, හල්විටිගල ප්රදේශයේ පදිංචිව සිටි 35 හැවිරිදි පුෂ්පකුමාරි සඳමාලී ගමගේ මෙනෙවියයි.
ඇය ගමන් ගත් වෑන් රථය, කොළඹ දෙසට ධාවනය වෙමින් තිබූ ලොරි රථයක පිටුපස ගැටීමෙන් මෙම මාරක අනතුර සිදුව ඇත. රථයේ රියදුරු ලෙස කටයුතු කර තිබුනේ සඳමාලි ලබන දෙසැම්බරයේ විවාහවීමට සිටි පෙම්වතාය.
පොලිසිය පවසන්නේ රියදුරුට නින්දයාම අනතුරට හේතුව බවයි.
අනතුර සිදුවන අවස්ථාවේදී කුඩා දරුවන් තිදෙනෙකු ඇතුළු පුද්ගලයන් අට දෙනෙකු වෑන් රථයේ ගමන් කර ඇති අතර, අනතුරින් මියගිය සඳමාලී මහත්මිය හැර අනෙක් සත් දෙනාම තුවාල ලබා රෝහල් ගත කර තිබේ. ඊශ්රායලයේ රැකියාවක නිරතව සිට මෙරටට පැමිණි තම සහෝදරයාව රැගෙන ඒම සඳහා ඇය මෙසේ ගුවන්තොටුපළ බලා යමින් සිටියදී දක්ෂිණ අධිවේගී මාර්ගයේ 9.6 කිලෝමීටර් කණුව ආසන්නයේදී මෙම අවාසනාවන්ත සිදුවීමට මුහුණ දී ඇත.
ඕපාත සහ තවලම ප්රදේශවල “යමී කේක්” නමින් ව්යාපාර දෙකක් පවත්වාගෙන ගිය ඇය, සිය දක්ෂතාව සහ උත්සාහය තුළින් ප්රදේශයේ ජනාදරයට පත්ව සිටි චරිතයකි. තවලම විද්යාරාජ විද්යාලයේ ආදි ශිෂ්යාවක වූ ඇය, පස් දෙනෙකුගෙන් යුතු පවුලේ සිව්වැන්නා විය.ශෝචනීය සිදුවීම තවත් සංවේදී කරවන්නේ, මියගිය තරුණිය එළඹෙන දෙසැම්බර් මාසයේදී විවාහ වීමට සූදානමින් සිටීම සහ අනතුරට පත් වෑන් රථය ඇගේ අනාගත සැමියා විසින් පදවාගෙන යනු ලැබීමයි.
මගේ දූ කේක් හදන්න හරිම දක්ෂයි. ඕපාතයි, තවලමයි කේක් කඩ දෙකක් කරනවා. එයාගෙම මහන්සියෙන් වාහනේකුත් ගත්තා. මුළු ඕපාතම එයාට ආදරෙයි. කවුරුත් ඇයට කතා කළේ “යමී කේක් අක්කා, යමී කේක් නංගී කියලා. මගේ දූ මාස දෙකකින් බඳින්නයි හිටියේ” යැයිද සඳමාලිගේ මව දැඩි ශෝකයෙන් යුතුව පැවසුවාය.
පස් දෙනකුගෙන් යුත් පවුලේ හතරවැනියා සඳමාලි ගමගේය.තාත්තා කවුරුත් හඳුනන උඩුගම ලංගම ඩිපෝවේ සේවය කළ රංබණ්ඩාය. සඳමාලිගේ හදිසි මරණය ගැන මියගිය තරුණියගේ ලොකු අම්මා වන අනුරා පතිරණ මහත්මිය පැවසුවේ,
“අපේ දූ බඳින්න හිටියේ ලබන දෙසැම්බර් මාසේ. ඒ පුතා පැදවූ වාහනේ යද්දී තමයි මේ අනතුර වුණේ. රස කේක් හදන්න මේ දූ හරිම දක්ෂයි.”
